Barnadansar í Egilshöll og Laugum

 

Vegna eftirspurnar þá höfum við orðið við óskum viðskiptavina okkar og bætt við danshóp fyrir yngstu danskrúttin okkar í barnadönsum í Egilshöllinni okkar. Barnadansar eru líka kenndir í Laugum og bjóðum við nú upp á fría prufutíma í báðum stöðvum á morgun, laugardaginn  24. janúar.

Fyrstu tímar fóru fram á laugardaginn var en sökum fyrirspurna í vikunni þá höfum við ákveðið að halda úti einum prufutíma til viðbótar þennan laugardaginn.

Solla Stirða kemur og kennir nemendum ofurhetjudans á önninni og nemendur taka einnig þátt í nemendasýningu skólans í Borgarleikhúsinu í lok annar. Það er því nóg um að vera.

Skráðu danskrúttið þitt í prufutíma hjá okkur á netfangið: dwc@worldclass.is.

Nánari upplýsingar um námskeiðið er að finna hér á síðunni undir, danstímar.

10-12 ára danshópum í Egilshöll og Ögurhvarfi skipt upp vegna eftirspurnar

Eins og áður hefur fram komið þá fer vorönn vel af stað og það vel fram úr okkar björtustu vonum. Eftirspurn eftir dansnámi hjá skólanum hefur aldrei verið meiri og höfum við núna opnað fyrir biðlista í þá hópa sem nú þegar eru orðnir fullir.

Danshópar 10-12 ára í Ögurhvarfi og Egilshöll eru mjög vinsælir þessa önnina og fór eftirspurn um pláss í danshópunum langt fram úr framboði. Við höfum því þurft að gera viðeigandi ráðstafanir og munum skipta hópunum upp. Skipting á danshóp í Egilshöll hefur nú þegar átt sér stað og fara tímar í þeim aldursflokk nú bæði fram á mánudögum og miðvikudögum kl.15.00-16.00 og á þriðjudögum og fimmtudögum kl.16.30-17.30.

Danshópurinn í Ögurhvarfi mun sækja danstíma á morgun, þriðjudag, samkvæmt tímatöflu. Kennari mun þá klára stöðumat á hópnum og munum við setja okkur í samband við foreldra í framhaldinu. Danstímar hjá þessum aldursflokk munu fara fram á þriðjudögum og fimmtudögum, annar hópurinn kl.15.15-16.15 og hinn hópurinn á núverandi tíma samkvæmt stundatöflu eða kl.16.30-17.30.

Við skiptingu á hópunum er bæði horft til getustigs og félagslegra þátta. Dansinn er félagslegur og munum við að sjálfsögðu horfa til þessa. Ef þú hefur ekki fengið póst frá okkur í kvöld, mánudagskvöld, til upplýsinga um stöðuna þá endilega sendu okkur tölvupóst á netfang okkar, dwc@worldclass.is.

Aðsóknin aldrei meiri

Það eru algjör forréttindi að fá að sinna því starfi sem við sinnum og með svona mikið af hæfileikaríkum og yndislegum nemendum. Vorönn fór af stað með látum og áttum við svo sannarlega ekki von á þessum viðbrögðum. Allir hópar eru stútfullir og höfum við nú opnað fyrir biðlista. Skólinn okkar hefur verið í stöðugum vexti en vaxtarkippurinn hefur aldrei verið jafn mikill og á haustönn 2014 og nú á vorönn 2015. Hann var stór á haustönn en enn stærri nú á vorönn.

Við erum svo þakklát fyrir að deila þessari ástríðu sem við berum fyrir dansinum með öllum þessum metnaðarfullu nemendum okkar. Dansskólinn er framsækinn og fullur af úrvals kennurum og danshöfundum. Miðað við árangurinn sem við erum að sjá þá er hæfileikafólk í hverju horni. Árið 2015 verður því án ef spennandi og við hlökkum mikið til að taka stöðumat á árangri nemenda þegar líður á önnina.

Danshópar í aldursflokki 10-12 ára í Egilshöll og Ögurhvarfi eru það vinsælir að við höfum þurft að skipta þeim upp í tvo hópa. Við erum að senda út tölvupóst á foreldra þeirra nemenda sem eru í þeim hópum. Ef þú hefur ekki heyrt frá okkur sendu okkur póst á dwc@worldclass.is og við svörum þér um hæl.

Nemendasýning 25. mars

Skólinn er löngum orðinn þekktur fyrir glæsilegar nemendasýningar sínar en þær eru árlegur viðburður á vorönn. Sýningin fer fram á stóra sviði Borgarleikhússins að venju og er dagsetningin miðvikudagurinn 25. mars.  Í ár er uppsetningin byggð á ævintýrum Simba í Lion King. Sýningin spannar allt frá grimmum hýenum til gleðidansa Tímon og Púmba. Mikið er lagt upp úr upplifun áhorfenda og sjónarspili leikhússins.

Nemendur skólans sameinast allir undir þaki leikhússins í lok vorannar og sýna listir sínar. Allir nemendur skólans þátt í að setja upp glæsilega sýningu sem er þematengd og færir dansæfingarnar í danssal yfir á stórt og viðamikið svið. Sýningin stækkar í sniðum með hverju ári sem líður og kennarar skólans setja ekkert þak á sköpunarþörfina og ímyndunaraflið þegar líða tekur að undirbúningi sýningar. Mikið er lagt upp úr hverju atriði sem og búningum, lagavali og útliti sýningar. Markmiðið með sýningunni er að allir hafi gaman af og fái reynslu af sviðsframkomu.

Kennarar hafa strax hafist handa við undirbúning á sýningunni og erum við spennt að hefja æfingar með nemendum þegar líður á önnina.

 

Fyrsti danshópur DWC stofnaður

Við erum hrikalega spennt að tilkynna að fyrsti danshópur skólans verður stofnaður á vorönn. Síðustu ár hafa nemendur okkar náð gífurlegum framförum og hefur grunnur í yngri hópum svo sannarlega skilað sér. Það sýnir sig greinilega í unglingahópum skólans í flokki 13-15 ára. Metnaðarfullir dansarar í unglingahópum verða valdir inn í hópinn á önninni. Við inntöku er horft til nemenda sem sækja vel danstíma skólans, sýna framfarir og metnað og hvetja aðra dansara áfram í sínum danshópum. Þetta eru einstaklingar sem geisla af gleði og áhuga, eru einbeittir í að bæta sig og eru gott fordæmi fyrir yngri og eldri dansara skólans.

Hlutverk danshópsins verður að koma fram fyrir hönd skólans og taka þátt í þeim verkefnum sem skólinn stendur fyrir.

Við höfum enn ekki fundið hið fullkomna nafn á danshópinn og leitum því til dansfjölskyldunnar okkar. Við eflum til leiks á Facebook og köllum eftir skemmtilegum hugmyndum að góðu nafni sem endurspeglar danshópinn og þau gildi sem hann nær yfir.

Taktu þátt 🙂

Skráning aldrei meiri


Vorönn hefst í næstu viku og fara fyrstu danstímar fram mánudaginn 12. janúar. Skráning er nú í fullum gangi og er óhætt að fullyrða að hún hafi aldrei farið jafn vel af stað. Einhverjir hópar munu fyllast fyrir helgi og hvetjum við alla þá sem hafa áhuga á að hefja dansnám við skólann til þess að tryggja sér pláss hið fyrsta. Allir danshópar takmarkast við ákveðinn nemendafjölda og því er ekki hægt að ganga að því vísu að enn verði laus pláss eftir helgi. Það er spennandi dansár framundan og hlakka kennarar skólans til að taka á móti nýnemum sem og öðrum föstum nemendum skólans í næstu viku.

Allar upplýsingar um danshópa og starfsemi skólans er að finna hér á síðunni. Ef einhverjum fyrirspurnum er ósvarað þá hvetjum við alla til þess að hafa samband við okkur á netfangið dwc@worldclass.is.

Dansarar skólans tóku yfir Áramótaskaupið

[vc_row][vc_column][vc_column_text]

Það ætti ekki að fara fram hjá neinum að glæsilegir dansarar skólans tóku yfir sjónvarpsskjáinn í lok Áramótaskaupsins í síðustu viku. Mikil leynd ríkti yfir verkefninu eins og gefur að skilja og þurftu nemendur að sitja á sér og deila engum fregnum af verkefninu fram til áramóta. Stella Rósenkranz, deildarstjóri, sá um útfærslu atriðisins í samráði við Silju Hauksdóttur, leikstjóra, auk annarra starfsmanna sem komu að verkefninu á vegum Ríkisútvarpsins. Hinn sívinsæli Unnsteinn Manuel sá um söng á einu vinsælasta lagi ársins 2014, lagið Happy með tónlistarmanninum Pharrell Williams. Þó almenningur virðist hafa mismunandi skoðanir á ágæti Skaupsins í ár þá eru allir þó sammála um að lokaatriðið hafi verið hið glæsilegasta. Mikið umfang var í kringum verkefnið og var tökudagur hinn skemmtilegasti. Fleiri þekktir íslenskir tónlistarmenn tóku þátt í verkefninu og má þar nefna Ólaf Arnalds, sem skein skært í hlutverki Justin Timberlake, og tónlistarhópurinn Reykjavíkurdætur.

Þetta var æðislega skemmtilegt verkefni sem var unnið í samstarfi við frábært listrænt teymi á vegum Ríkisútvarpsins. Við erum hrikalega stolt af nemendum okkar!

Hér að neðan má sjá nokkrar myndir á bak við tjöldin við upptökur á atriðinu.

[/vc_column_text][/vc_column][/vc_row][vc_row][vc_column width=“1/1″][vc_gallery type=“image_grid“ interval=“3″ images=“2866,2867,2868,2869,2870,2871,2872,2873,2877,2878,2879,2880,2882,2883,2884,2885,2886,2887″ onclick=“link_image“ custom_links_target=“_self“ title=“Upptökur á lokaatriði Áramótaskaupsins“][/vc_column][/vc_row]

Gleðilegt ár

Elsku dansfjölskyldan okkar. Gleðilegt ár og takk fyrir það gamla. Við erum búin að eiga æðislegar stundir saman á árinu sem er að líða og erum við þakklát fyrir þær allar. Stor verkefni komu inn á borðið tok okkar sem dansararnir okkar tóku þátt í og erum við ofur stolt af öllu því sem við áorkuðum saman á árinu. Dansskólinn hefur aldrei verið stærri og hlökkum við til að hitta núverandi nemendur og taka á móti nýjum nemendum á nýju ári. Dansárið 2015 verður svakalegt!

Gleðilega hátíð og gleðilegt nýtt ár til ykkar allra 🙂